Xehetasunak

Urriaren 31n, ostirala,  Gonzalo Garridoren 'El patio inglés' liburua aurkeztuko da Bilbon. César Coca, El Correoko zuzendaritza laguntzailea eta Alrevés argitaletxeko Carlos Pujol egongo dira aurkezpen ekitaldian idazlearekin batera. Aurkezpena arratsaldeko 19.30etan Urkixo Zumarkaleko 9an dagoen Casa del Libro liburu dendan izango da.

Bere bigarren eleberri honetan, 'Las flores de Baudelaire' eleberria eta gero, egileak berak aditzera eman duenez “zerbait pertsonalagorako erregistro aldaketa” topatuko dugu. Bizitzaren, kamusada eta minaren inguruko istorio barne-barnekoa. Eleberriak senideen arteko iskanbilatan jartzen du arreta, gure jendartearen zenbait planteamendu bidegabeetan, gure patua onartzeko zailtasunean".

Protagonista, Pablo, laurogeigarren hamarkadako gazte bat da, “Zuzenbidea ikasten hasia patio ingeles bat duen etxe batean bere familiarekin batera bizi dena. Asteburuetan bere lagunekin irteten da, parranda, mozkortzera; neskalagunen bat edo beste izan du eta literatur zirkulu bateko kidea da, zeinari esker nahikoa polemiko izan den artikulua argitaratu duen egunkari batean. Bere gurasoek arraro xamar sumatzen dute, ezertarako gogorik gabe eta munduarekin bueltaka, nerabe gehienetan normala den jarrerarekin. Aldiz, egun batean, bere gurasoen harridurarako, aho bete hortz uzten ditu, egongelako leihoa zabaldu eta bere buruaz beste egiten duenean”.

Xehetasunak

Abel Amutxategik datorren urriaren 31n, ostirala, Donostian aurkeztuko du 'Berbontzi' izenburuko bere lan berria, non irakurtzea maite ez duen Nora izeneko neskatilaren eta fantasiazko mundu batean bizi den liburu-jale amorratua den eta irakurtzen dituen istorioak etengabe kontatzen dituen mutiko lotsati baten arteko adiskidetasun istorioa kontatzen digun.

Amutxategiren esanetan, "Norak, ezinbestean, bere lagun berriarekin biziko dituen abenturei esker irakurketaz gozatzen ikasiko du". Egileak azaldu bezala, liburuak “haur literaturako motibo klasikoak (lehenengo honetan piratak, printzesak eta sorginak) azpikoz gora jartzen saiatzen da, horiei irauli bat emanez, literaturaren gozamenari heltzeko gonbitea luzatuz adinez txikitxoenei".

Aurkezpena Donostiako Udal Liburutegiko (Konstituzio Plazan) Duque de Manda saretoan egingo da goizeko 11:30etan. Ekitaldian, Amutxategiren liburu honekin batera, Joxemari Iturralderen 'Nire lagunen gezurrak' eta Juan Luis Zabala 'Aita oker dago' liburuak ere aurkeztuko dira.

Liburuko laburpena /   Abel Amutxategirekin elkarrizketa Auxmagazinen

Xehetasunak

Juan Gracia Armendáriz idazleak Diario de Navarrako bere asteroko zutabean Juan Carlos Márquezen 'Los últimos' eleberriari buruzko erreseina idatzi du, besteak beste, agerian jarriz hau badela “irakurlea lepotik heltzen duen eleberria, planeta agoniko, absurdu eta kanibal baten barnako ibilbidera bultzatuz, non pop elementuak topatuko dituen, umorez jorratuak”.

Berria irakurtzea.

Xehetasunak

Pariseko Naïve argitaletxeak 'Le détective des sons', 2011an Libros de Pizarra argitaletxeak argitaratutako Luisa Etxenikeren 'El detective de sonidos' liburuaren frantseseko bertsioa eman berri du argitara.

Gazte batek honako iragarkia jarri du: “soinu biografiak egiten dira”. Diru beharra du eta azken hilabeteetan deskargatu dituen milaka kantuak etekinak ateratzeko balia ditzakeela pentsatu du. Bezero bi izanen ditu: bere bizitza markatu izan duten soinuak berreskuratu nahi dituen atsoa eta erailketa arraro bat aitortzeko interneteko audientzia erakarri nahi duen gizona. Detektibe gazteak gero eta konplexuagoak eta estuagoak bilakatuko diren intriga bi hauetan sartua ikusiko du bere burua. Gauzak horrela, intriga bi hauei hirugarren bat gehitu beharko dio berehala: bere bizitza berarena.

Xehetasunak

Javier Minak urriaren 16an Donostiako Lagun liburu dendan 'El dilema de Proust o el paseo de los sabios', Historian barna paseoaren inguruko saiakera, aurkeztuko du, Berenice argitaletxearen eskutik.

Egileak berak azaltzen duen bezala, “Grezia zaharretik egun arte paseoaren historia jasotzen duen liburua dugu”, baina, betera, “paseatzearen artearen inguru egile zenbaiten hausnarketak jasotzen dira bertan”. Hautatutako iturriak “literarioak eta zuzenak dira, bigarren mailako iturri gutxi dago, izan ere, helburua bada aztertzea nola idazle ezberdin horiek –bai eta pentsalariren bat edo beste- baloratzen duten kalera edota mendira ateratze hori, zein helburuarekin eta estrategiarekin eta zein hausnarketa eratorri diren hortik. Ez da paseoari buruzko idazleen antologia, paseatzeak suposatu izan duena adierazi nahi duen ikerketa baizik”.

Aurkezpena arratsaldeko 19.30etan izango da. Javier Minarekin batera, EHUko Estetika irakaslea den Mikel Iriondo egongo da aurkezpenean.